ゆんたく物語

「うさがやびら」「くゎっちいさびら」「食（か）まいい」

　あるしょううちなあぐちさあやる友（どぅし）からぬ訊（ち）ち事（ぐとぅ）どぅやいびいる。
　「んじ、むぬ食（か）むる前（めえ）ぬ言（ゆ）る言葉（くとぅば）んかい、『いただちゃびら』んでぃん、あたがやあ」
　テレビんじ、言ちょおたんでぃぬ事（くとぅ）やいびいん。聞（ち）ちばっぺえんあらん風儀（ふうじ）やいびいたん。我（わ）んにん、「いただちゃびら」んでぃぬ言葉あ聞ちぇえなあびらん。
　確かに、近頃（ちかぐる）お、日本語からぬ直訳調うちなあぐちぬまんでぃ、とぅぬうまぬうする事んあいびいん。異風（いふう）なあや、やいびいしが、やくとぅんでぃち、うんな言葉、使（ちか）ゆる人（ちゅ）んかいばっぺえとおんでぃち、怖気（うじ）らあすしやか、新語（みいくとぅば）んでぃ思（うみ）やあに、伸（ぬ）びてぃ取（とぅ）らすしえましえあいびらに。言葉あ使いねえ、使ゆるさく、変（か）わてぃ行（い）ちゅるむぬやい…。
追記：やてぃん、無（ね）えらん語（くとぅば）やれえ、うぬまあまあ、語、借（か）てぃ使（ちか）てぃん済（し）まびいしが、昔（んかし）からある語あ、使え続（ちぢ）けえゆしせえましんやいびいしがどぅ…。

参考１
　日本語ぬ「頂く」や、大概（てえげえ）「拝（うが、をぅが）むん」でぃん言（いゃ）びいしが、実（じゅん）ねえ、食（か）み物（むぬ）んかいや言（い）らんでぃ思（うむ）やびいん。
参考２
　芝居（しばや）ぬ「泊阿嘉」んじぬ乳母（ちいあん）ぬ言葉（くとぅば）なかい、「親（うや）がなしからぬ暇（いとぅま）ん、拝（をが）まびたい」ぬあいびいん。うぬ日本語しぬちむええや「親御さんからのお休みも、頂いたし」やいびん。
註：「食ま+いい」ぬ「食ま」や「食むん、食ぬん」ぬ未然形、「いい」や感嘆詞、「い」やてぃん済むまびいん。
　
琉歌
茶（ちゃあ）や二（たあ）ち茶
食（かむ）し腹八分（わたはちぶ）
やてぃどぅ肝（ちむ）体（からた）
また勝（まさ）ゆる

筆：比嘉　清

【語句、訳】