ゆんたく物語

日テレ系於（をぅ）とおてぃ、「秘密のケンミン・・・」んでぃ言（ゆ）る番組ぬあいしいが、くねえだあ、沖縄（うちなあ）ぬ「サーターアンダギー」ぬ取（とぅ）い持（む）たっとおいびいたん。
　いいくるうぬ番組んかい出（ん）じとおる具志堅用高ぬ「石垣ではサーターテンプラーと言っていたけどね」んでぃち、叫（あび）とおたしが、うりにちいてぃぬ他（ふか）ぬ人（ちゅ）お、ただ聞（ち）き流（なが）らするうっぴどぅやいびいたる。
　「サーターテンプラー（サーターティンプラー）」んでぃ言ちょおたしえ、何（ぬう）ん石垣びけえのおあいびらん、我（わ）っ達（たあ）、うるま市まんぐらんじん、あん言ちょおいびたん。確かに、早（ふぇえ）くお、いいくる「サーターティンプラー」どぅやたる筈（はじ）やいびいしが、何時（いち）ぬ間（みい）がやら首里那覇（しゅいなあふぁ）言葉（くとぅば）ぬ「サーターアンダギー」んかいけえ変（か）わとおいびいん。昔ぬＮＨＫぬドラマ「琉球の風」んじん、「サーターアンダギー」んでぃる言ちょおいびたる。
　言葉んでぃせえ、言い立てぃゆる力（ちから）ぬある所（とぅくる）ぬどぅ、広（ふぃる）まい易（や）っさるむぬやんでぃ、思（うむ）やびいん。
　『沖縄語辞典』ぬんかい「サーターアンダギー」やあしが、「サーターティンプラー」や無（ね）えやびらん。やいびいしが、地方言葉ん混（ま）んきてぃ示（み）してえる『うちなあぐち大字引』んかいやあいびいん。
 「サーターアンダギー」や漢字せえ「砂糖油揚ぎい」、「サーターティンプラー」や「砂糖天麩羅」やいびいん。
筆：比嘉清

---

【訳】
　日テレ系で「秘密のケンミン・・・」という番組がありますが、この前は、沖縄の「サーターアンダギー」が取り上げられていました。
　この番組によく出演する具志堅用高が「石垣ではサーターテンプラーと言っていたけどね」と発言しましたが、これについては他の出演者はただ聞き流すだけでした。
　「サーターテンプラー（サーターティンプラー）」といっていったのは、何も石垣だけではありません。わがうるま市あたりでも、そのように言っていました。確かに、以前は、大体は「サーターティンプラー」だった筈なのですが、いつのまにか首里那覇語であるぬ「サーターアンダギー」にとって代わってしまいました。昔のＮＨＫのドラマ「琉球の風」でも「サーターアンダギー」でした。
　言葉とうものは、発信力のある地域語が普及するものなのだと思う次第です。
　『沖縄語辞典』には「サーターアンダギー」はあるが、「サーターティンプラー」はありません。ですが、地方語を併記している『うちなあぐち大字引』にはあります。
　ちなみに、「サーターアンダギー」は漢字では「砂糖油揚ぎい」、「サーターティンプラー」は「砂糖天麩羅」です。
筆：比嘉清